神學界風波

為免你我他忘掉香港的神學界，特在此立照備份。
上帝要人滅亡，必先令他瘋狂。

神學界風波
https://sites.google.com/view/hytrmnndhgdgh

今年係宗教改革五百週年，各界密鑼緊鼓咁搞慶祝活動時，估唔到香港教會界發生件咁嘅事，令到花生價格急升，真係唔知攞景定贈慶。講嘅係Facebook專頁"神學是粉紅色的秋"嘅陳韋安VS浸神新約老師曾思瀚呢單野。當中故事何解，又點解咁多教會中人會圍住李絲絲個FB轉，等我哋為大家娓娓道來。
如果你同我哋一樣，鍾意上網，會留意政治，又留意下教會消息，早喺2015年，教會界中曾經為應唔應該放棄十席特首選委而有過少少辯論，主張棄席嘅中堅人馬有港侯三寶（禤智偉，劉振鵬，鄧紹光），而陳韋安寫過幾篇文表達不同睇法反對棄席，相信就咁辣着對家。港侯果邊嘅浸神師生網絡關係好CLOSE，有一大群人好唔LIKE。估計幾個老師應該都唔多老嚟，但仲未搲爛塊面。
之後，幾位老師合寫咗一篇二萬幾字嘅長文，大炮打烏蠅咁回應陳韋安果幾篇散文，叫陳唔識侯派神學就收嗲。一時間令我哋覺得，原來教會咁關心政治，咁緊張呢十席嘅去向，之前話教會唔理政治真係怪錯晒。
雖然文章表面上仍客客氣氣和和諧諧，但底下眾FANS早就搖旗吶喊，歡呼叫好，差D未有人叫「港侯三聖，文成武德，中興聖教，一統江湖」。當時圈子內嘅facebook，不時見到有人留言講呢件事，都係認為陳韋安先撩者賤，打死無怨，"還拖"、"夠唔夠膽"、"無知"、"而家［三寶］係明踩"、"垃圾"、"idiot"之聲不絕於耳。甚至有一位牧師同另一位牧師打賭話：「如果陳韋安夠膽回應，我輸一篇道！」意思是到對方教會講一次道。原來上帝嘅道可以用嚟對賭，真係令人大開眼界，唔知果位牧師到時收唔收講員費呢？唔知咁有冇違反講道者責任？
當時睇埋睇埋呢D喊打喊殺嘅留言，真係令我哋停一停，諗一諗，呢到係咪教會。
點知，陳韋安可能見對方來勢汹汹，人多勢眾，竟然冇應機，就咁道謝對方，仲話想同大家做個朋友，試圖打個完場。咁就大件事喇，對方擺好戰陣，擂鼓三通，磨刀霍霍，你竟然唔接戰，冇出嚟比人打一身，真係唔啱規矩。大家一腔熱血無處發洩下，認定陳韋安做縮頭烏龜，扮受害人博同情，漸漸睇唔起佢，愈睇佢愈唔順眼。
但另一邊廂陳韋安嘅"神學是粉紅色的秋"經營有道，儼如教會界一顆閃耀新星。正所謂人怕出名豬怕肥，浸神果邊呢（只係講緊果幾個老師連FANS咋，唔係全部呀，下同），就有人開始網上追擊陳韋安，而好衰唔衰，陳韋安有次真係寫錯希臘文，被對家恥笑個學位係呃返嚟。但更多時間，係唔理對錯全天候式抽水圍毆，有次只係篇文多幾隻德文拉丁文，都比人話佢扮晒蟹。改經文嚟整個笑話又係死罪嚟架，曾思瀚義正嚴詞咁鬧佢唔尊重聖經，直頭係褻瀆上帝。之但係，有時我哋又見其他神學院老師改經文嚟講笑，又唔見有任何人扯哂火。又有一次，曾思瀚直頭唔介意承認自己係度侮辱緊陳韋安。吹咩，佢就係完全唔覺得有唔妥，先撩者要打死，有乜問題。其他人聽到，呆了一下，原來基督徒兼神學院老師可以侮辱人。
陳韋安就話呢，當有人背後取笑佢，佢會選擇沉默，拒絕寫文回應，有時仲會刪帖道歉，佢話呢個叫做成年人嘅屬靈操練。但村民唔係咁諗，刪帖道歉咁嘅動作喺眾人眼中就係斷正，真係有錯，唔係出於愛心息事寧人。正所謂"今日留一線，他朝比人串"、"忍一時激親自己，退一步益埋人地"，對家覺得佢以退為進唔係有愛心，而係玩野扮可憐，甚至話咁可憐當初就唔應該撩交打啦。話時話，乜原來有人認為喺時代論壇寫文表達自己立場同諗法，係撩交打，係冇愛心，真係見識少。
Keep住呢一兩年，浸神小圈子果邊都冇停過咁鬧，愈鬧愈興奮，話陳韋安冇資格教神學，係垃圾、冇人格、可恥。但吹漲係，你愈鬧，人地粉紅陳個page愈受歡迎，短時間內呃like成二萬幾個，深受教內年青人歡迎，完全係教會界奇葩。
人紅自然是非多，呢一頭又掀出另一號人物李絲絲。
大家可能聽過李絲絲個"大名"，或者見過佢嘅玉照，佢活躍喺各大基督教FB專頁，佢專門爆粗狂鬧大陸，狂鬧香港政府，狂鬧泛民，鬧左膠大愛包容L，邊個教牧夠膽維穩或者宣揚大愛，就會成為李絲絲嘅長期"問候"對象。心靈脆弱嘅信徒千祈唔好去睇，所以我哋都唔提供連結。
查實，我哋心靈比較硬淨，我哋係李絲絲FB frd嚟，雖然我哋冇咁麻甩狗公日日蒲住佢個PAGE，睇佢講乜同派LIKE，不過我哋可以做見證，佢早幾年係冇咁痴線，但近一兩年，明顯多咗一班人圍住佢轉，講乜都有讚冇彈，呃LIKE無數，幾乎勁過德蘭修女、媲美麥當娜，令到佢變本加厲，把口愈嚟愈臭，鬧人愈嚟愈唔駛本。我哋絕不否認李絲絲係一名靚女，佢仲會偶然出一兩張性感相，派下軍餉。但至於係咪因為佢夠靚女，所以吸引到一大班(男)牧者/信徒駐場派LIKE呢，大家都係男人，明嘅。而長期駐場人士當中更有大名鼎鼎嘅曾思瀚博士，仲有好支持佢嘅噴飯諾同埋一位莫牧師。
好死唔死呢，大約喺2016年年底，陳韋安出左篇文，叫"不可仇視大陸人"，自此李絲絲視陳韋安為眼中釘，講乜插乜，甚至連陳韋安冇講出口嘅野，李絲絲依然會想當然咁鬧埋一份，即係老屈。明眼人會為意到，李絲絲同剛才提到嘅浸神小圈子，同步率十分高，呢邊有人開口鬧，另一邊就會有人接力。不過呢，如果李絲絲真係咁憎大愛包容，要一視同仁嘅話，浸神圈子裏面應該好多人要比佢用粗口問候，點解咁多人走得甩，而佢要專針對陳韋安？正如點解唯獨陳韋安改經文嚟整笑話就係錯，其他人用經文搞笑就冇事，真係一個謎，可能背後有好多高深神學，我哋細路仔唔會識嘅。
去到2017年嘅愚人節，陳韋安唔知死咁，開咗個玩笑抽咗曾思瀚一野，笑話係：陳韋安話自己出版果本書有錯漏，懇切道歉之餘，會送贈曾思瀚嘅書作為賠償。大家覺得愚人節玩笑無傷大雅之際，但村民唔係咁諗。浸神小圈子果邊認定佢挑釁，抽水，人格盡失，又係垃圾，甚至仲話考慮要搵律師告佢，因為佢影響出版商嘅生意喎。李小姐自然同步發炮，一大群人上晒頭，搞到陳韋安要刪POST道歉，而家仲可以喺粉紅秋到睇得返個道歉POST，以及李小姐咄咄逼人嘅留言。曾思瀚當時講到自己好嬲，佢話邊個夠膽去LIKE陳韋安，唔該立刻unfriend佢，大有漢賊不兩立嘅霸氣。
去到2017年7月，陳韋安喺一篇文話香港教會政治分歧比宗派分歧更考驗合一信念。正所謂言者無心，聽者有意，當建制派好多人仆出嚟話自己係基督徒呃選票之際，你仲話要同唔同立場嘅人共存，自然比人SPIN去話係維穩投共，喺浸神小圈子同李絲絲眼中，又係十罪不赦、罪該萬死、天打雷劈、千刀萬剮，絕子絕孫。雖則，呢種藍絲黃絲要合一溝通嘅講法，喺雨傘運動之後，於教會流行一時，相信浸信會體系之內有Ｄ人都會BUY。事實上，港侯三寶批評佔中時都有講過話應該要多Ｄ溝通。話哂，佢哋都喺教會打工，點會未同果Ｄ唔想批評大陸但又會鬧年青人係廢青嘅教牧合作過呢。
再過幾日，陳韋安就宣佈摺埋，無限期停止更新專頁，明眼人知道，係因為佢頂唔順無日無之嘅恥笑，侮辱同埋騷擾，雙拳難敵幾十對手，所以只好自己消失。佢冇公開交代原因，二萬幾個LIKE當中，可能九成唔知發生乜事，有青年少牧者同我哋講，佢有個靚仔覺得好無辜，好失落。
咁啱得咁橋，人稱齋SIR嘅陳士齊博士睇到李絲絲個WALL寫「陳韋安叫啲基督徒包容教育局副局長蔡若蓮和楊鳴章主教，與他們共存！」，就以為陳韋安真係為政權講說話，維穩投共，於是喺自己個FB一齊鬧。但後來佢直接問陳韋安，對方話唔係呢個意思，亦根本冇講過上述說話。陳士齊就公開收回言論同埋向陳韋安道歉，當時齋SIR仲有叫李絲絲唔好亂屈人，叫佢收返個POST。果陣時，仲有張國棟博士走出來加把口，話陳韋安篇文係寫得唔好，因為原則唔夠清楚，但唔清楚嘅地方應該係要求佢解釋，唔係立刻打死。李絲絲怒火中燒，結果陳士齊同張國棟齊齊被"問候"。成班浸神小圈子嘅人睇到，全部唔出聲，唔對話，亦唔肯改變佢哋鬧陳韋安係投共教牧嘅講法，佢哋應該當哂齋SIR同張國棟係陳粉，係誓不兩立嘅仇人。同時，曾思瀚等人仲要繼續LIKE李絲絲，令佢更加有恃冇恐。
去到九月，因應雨傘運動而誕生嘅"使命公民運動"，搞左個雨傘運動三週年培靈會，之前兩屆嘅講員都好有份量，但今次竟然請咗陳韋安。好老尷喎，明明係"投共維穩賣港賊"，點可以喺咁神聖嘅場合出現，仲要做埋講員？主辦單位點解仲信呢個人？但果篇講章出乎意料地鏗鏘有力，佢講到最後仲要激動到眼濕濕，好多信徒讚好，甚至有神學院老師（當然唔係浸神果Ｄ）話係典範講章，網上一時瘋傳。
浸神小圈子果邊呢，佢哋人才濟濟，當然又搵到野出嚟挑骨頭啦，今次係話kairos同chronos兩個希臘文唔係咁嘅意思。但有神學人同我哋講，呢個唔算係錯，只可以話係挑骨頭。言歸正傳，既然講到希臘文，領軍人物當然係聖經科老師曾思瀚博士。新仇舊恨，又點會放過呢個咁難得嘅機會呢，總之我係希臘文權威專家，我話你錯就錯啦，你母語係希臘文咩，駁咩咀丫。李絲絲亦同步發炮，其他人各有崗位，搖旗嘅搖旗，吶喊嘅吶喊。
但等等先，明明浸神嘅鄧公、禤博今年先寫完一系列關於聽道學嘅文章，禤博篇文仲講到「聽道者要用盡一切的方法去發現，上帝用各種渠道怎樣一直與我們溝通...專注和耐性，不妄下判斷、不自以為是、不先入為主，要求會眾勉力用功，要同講壇上或莫名其妙、或不知所云、或笨拙粗疏的人的說話摔交，直至從中聆聽到上帝的話語為止」，佢哋話無論篇道講得幾爛，總有神嘅聖言喺當中，叫大家唔好立亂批評講道者，外行領導內行。禤博篇文仲引過曾思瀚話，上帝甚至會藉驢子向人講話。點解班人咁快就唔記得，鬧到陳韋安篇道連垃圾都不如呢？究竟係陳韋安比唔上驢子，定係佢哋可以決定上帝有冇藉邊個把口講野，由佢哋決定邊D先係上帝嘅聖言呢？
針對講章呢件事，一直有人忍唔住要出聲，包括我哋呢D食飽飯冇野做，同兩邊人馬都無乜關係嘅花生友，因為涉及嘅人唔係無名無姓，唔少人有頭有面，卻淪為網上打手，集體霸凌另一間神學院嘅教授，改教五百年嚟真係聽都未聽過，當然改教頭四百八十年嚟都未有INTERNET啦，係咪。陳韋安一再退讓，自摺專頁，對方好似仲未夠喉。唔通佢哋想搞到以後冇教會敢請陳韋安講道？駛唔駛好似"殺無赦"何君堯對戴耀庭咁開個控訴大會？不如CALL齊一班信浸者上建道，直接叫建道院長梁家麟炒咗陳韋安，叫佢唔好誤人子弟，再擺返幾圍和頭酒賠罪，然後公告全港浸信會，邊間浸信會膽敢請陳韋安講道，即刻踢出浸聯會，再外判比李絲絲等人係網上批鬥，長期"問候"，一於有你無我，務求將陳韋安趕出香港教會界為止？
我哋真心想問一句，呢班人心入面，基督信仰係咩？信耶穌信成咁？講緊仲唔係一般平信徒喎，牧緊會嘅又有，出書嘅又有，教緊神學嘅又有。咁搞法，就算比果個浸神小圈子贏咗，佢哋話唔准邊個喺全港教會講道，邊個就冇得講，全港教會由佢哋指點江山，陳韋安消失喺香港教會界，對教會群體有咩益處？我哋一班花生友睇見，淨係覺得成件事好恐怖，一言不合，立場不同，就動用神學院嘅師生網絡，甚至培養李絲絲呢類人，用足兩三年時間去鬥死對方。身邊有打算讀神學嘅信徒，知道呢件事之後，表明一定唔會揀浸神。
教會無道，又豈止講台之上呢。
不過講開又講，香港嘅浸信會近年真係多事，早十年八載有浸神孫寶玲嘅網誌事件，之前仲出埋書要大家一定記得發生咩野事，之後大埔浸信會因為籌款擴堂恩典席件事上報，近年浸聯會比玩具大王顧明鈞因培正小學重建單野告上法庭，九龍城浸信會廿億擴堂又係鬧到滿城風雨，就早幾日九龍塘浸信會又比間幼稚園告佢用隱型員工CAP水，雖然我哋知道浸信會係各自獨立，但同一宗派內，出事率未免有D偏高咗少少，所以愛護教會嘅大家真係切切要為浸信會禱告，尤其為人師表嘅浸神老師，求神保守佢哋，因為魔鬼最鍾意擊打牧人同教師，佢哋一失腳就可以絆倒好多人。
近日最新發展，陳韋安終於打破多時沉默，正式嘗試回應曾思瀚，不過地方好似揀錯咗，佢竟然去咗李絲絲個FB同曾思瀚傾。人地主場仲駛留手咩，自然又再吊打陳韋安一番，之後，話自己好真心歡迎陳韋安求和嘅李絲絲，轉頭就將陳韋安寫嘅留言仲全數刪除，不過好彩呢個世界有樣野叫CAP圖，一Ｄ有識之士睇到，唔覺得超串嘅曾思瀚有POINT。之後，經常因為反共言論戶口被面書查封嘅李絲絲，咁啱又被封咗，於是佢立刻賴哂落陳韋安度，之前唔知真心定假意嘅和好就咁一筆勾銷，自命聰明嘅曾思瀚竟然冇考慮到有可能係因為其他言論被封，立刻安撫呢個慘被陳韋安陷害嘅李絲絲。咁樣，又當咗係新仇架喇。係，佢哋就係咁兒戲就當新仇，大家習慣下啦。
跟住幾日，新仇舊恨，任何膽敢同情陳韋安出嚟講兩句話嘅人，都會受到李絲絲嘅眷顧同問候，亦愈嚟愈多人發現自己無啦啦比曾思瀚喺FB上面BLOCK左，當中有好多人根本冇同曾思瀚及李絲絲有任何交流，包括曾經同陳韋安合著出書但意見上跟陳韋安好唔同嘅洪麗芳，佢哋嘅罪名可能只係同陳韋安比較熟，以前喺粉紅留過言，即使冇歸邊但係比人覺得係粉紅FANS。由於洪麗芳將佢比曾思瀚BLOCK咗呢件事不點名咁寫上信仰百川，結果李絲連信仰百川都鬧埋，話有成班人想陷害佢。呢一輪BLOCK人同批鬥潮，可能拍得上黃絲藍絲割蓆咁誇張。
江湖傳聞，曾思瀚一向係咁，久不久就有一班人發現自己比佢BLOCK咗，毫無頭緒。就咁講，各人有自己方式用面書，我哋又唔係話佢手法有錯嘅，但佢喺呢兩三年愈來愈激，都幾有可能係因為冇哂其他想法嘅朋友，剩底搖旗吶喊嘅粉絲。教會輔導成日都有教落，要學習下從人哋嘅角度了解事情，咁就可以減少誤會，唔會諗埋一邊，呢個教導都幾有道理。
寫到最後，除咗一地花生殼之外，最想講嘅係，事情鬧到今時今日，前前後後加埋接近成兩年幾三年，似乎愈演愈烈，收唔到科，浸神小圈子一方固然殺得性起，想乘勝追擊，要對方人頭落地，粉紅班FANS忍咗咁耐，部份知道真相嘅人開始有反彈聲音，覺得陳韋安似乎過份退讓，姑息養奸。好似我哋呢D兩面逢源，同時知道兩邊消息嘅花生友，亦覺得浸神小圈子欺人太甚，有違牧者同神學教授操守。
大家各據山頭鬧得慶起，好似唔記得晒聖經教訓咁。陳韋安寫野講野真係要謹慎一D，做乜咁傻仔，明知人地討厭你，仲要搵人地嚟開玩笑？講起嚟真係唔抵幫。始終身為神學院老師，背負住神學院牌頭。佢做人亦應該大膽少少，覺得被人誤會咪澄清囉，做乜要縮，點解自以為冇錯都話要道歉呢？咁樣會令讀者好迷恾！但另一方面浸神小圈子想全面封殺陳韋安，難道又講得上合情合理，合於體統？都成功搞到人哋關閉專頁啦，做乜仲唔停手？點解要繼續人身攻擊，雞蛋裏挑骨頭，侮辱嘲弄，無所不用其極，甚至挑撥李絲絲去攻擊老屈？整件事喺知情嘅信徒之間，已經造成極大破壞，立下非常壞嘅榜樣。我哋從最大善意嘅角度去諗，大家應該係想為教會好，先至會執着於一言一詞，但亦唔應該升格到人格謀殺，將說話塞入人把口再批鬥，更加唔應該利用反共情緒而借刀。
人在做，天在看。亦有好多花生友睇到，唔好以為你靜雞雞挑撥離間就真係冇人知，雖然我哋好唔想遇到你，但真係有機會碰面嘅。

一群上得太多FB，終於想做Ｄ野嘅信徒同教牧
2017年10月7日

為免有人施壓，有膽做冇膽認，想逼我哋摺埋，讀者朋友記得抄低一份。
採用新版 Google 協作平台核心技術，。 建立協作平台檢舉濫用情形